کراچی میں کل شدید موسلا دھار بارش کی پیشگوئی، اربن فلڈنگ کا خدشہ

کراچی (کنزیومر واچ نیوز) محکمہ موسمیات نے شہر میں کل شدید موسلا دھار بارش کی پیشگوئی کرتے ہوئے اربن فلڈنگ کا خدشہ ظاہر کیا ہے۔ ترجمان محکمہ موسمیات انجم نذیر کے مطابق کراچی میں مون سون سسٹم ڈیپ ڈپریشن کی شدت کے ساتھ برقرار ہے جو سمندری طوفان بننے سے پہلے کی ایک اسٹیج ہے۔ انہوں نے بتایا کہ بارش کا سسٹم زمین پر موجود ہے اور اس کا مرکز تھرپارکر میں ہے، جس کے باعث 60 سے 70 کلومیٹر فی گھنٹہ کی رفتار سے ہوائیں چل سکتی ہیں۔ میئر کراچی کے مطابق سمندر میں پانی کی سطح بلند ہے اور اگر شہر میں تیز بارش ہوئی تو اس سے نمٹنا ایک بڑا چیلنج ہوگا۔ ترجمان نے کہا کہ سہ پہر میں موسلادھار بارش ہوسکتی ہے جبکہ کل یہ سسٹم کراچی کے قریب سے گزرے گا جس کے باعث صورتحال خراب رہنے کا امکان ہے۔ محکمہ موسمیات نے خبردار کیا ہے کہ شہر میں انفرااسٹرکچر کی کمزوری کے باعث اربن فلڈنگ ہوسکتی ہے اور نشیبی علاقوں میں پانی جمع ہونے کا خدشہ ہے۔ شہریوں کو ہدایت کی گئی ہے کہ تیز بارش کے دوران گھروں میں رہیں اور کچے انفرا اسٹرکچر سے دور رہیں۔ محکمہ موسمیات کے مطابق پورے اسپیل کے دوران کراچی میں 100 ملی میٹر سے زائد بارش ہوسکتی ہے۔