ہمیں مکمل یقین ہے کہ ہم فائنل جیتیں گے، شاہین شاہ آفریدی

لاہور:(کنزیومر واچ نیوز)لاہور قلندرز کے کپتان شاہین شاہ آفریدی نے کہا ہے کہ ہمیں مکمل یقین ہے کہ ہم فائنل جیتیں گے۔پاکستان سپر لیگ 10 کے فائنل میں رسائی حاصل کرنے پر شاہین شاہ آفریدی نے پوری ٹیم کی کارکردگی کو سراہتے ہوئے کہا کہ تمام کھلاڑیوں نے اہم موقع پر زبردست کھیل پیش کیا۔قذافی اسٹیڈیم لاہور میں کھیلے گئے اہم میچ میں لاہور قلندرز نے دفاعی چیمپئن اسلام آباد یونائیٹڈ کو 95 رنز سے شکست دیکر فائنل میں جگہ بنائی۔ لاہور نے پہلے بیٹنگ کرتے ہوئے 203 رنز کا ہدف دیا جس کے جواب میں اسلام آباد یونائیٹڈ کی پوری ٹیم 15.1 اوورز میں محض 107 رنز پر ڈھیر ہوگئی۔شاہین شاہ آفریدی نے شاندار باؤلنگ کا مظاہرہ کرتے ہوئے 3.1 اوورز میں صرف 3 رنز دے کر 3 وکٹیں حاصل کیں۔ میچ کے بعد گفتگو کرتے ہوئے کپتان کا کہنا تھا کہ پوری ٹیم کو اس فتح کا کریڈٹ جاتا ہے، سب نے اہم وقت پر کارکردگی دکھائی۔انہوں نے بلے بازوں کی تعریف کرتے ہوئے کہا کہ فخر زمان اور نعیم نے ہمیں شاندار آغاز فراہم کیا، خاص طور پر نعیم کی بیٹنگ قابلِ دید تھی۔شاہین آفریدی نے عبداللہ شفیق کی ذمہ دارانہ اننگز کو بھی ٹیم کی کامیابی کا کلیدی عنصر قرار دیا۔ عبداللہ کی اننگز نے ہمیں اعتماد دیا اور ہم نے مخالف ٹیم پر دباؤ ڈالا، خاص طور پر نئی گیند سے ابتدائی وکٹیں لے کر فتح کی بنیاد رکھی۔